„Ние како пратеници имаме добиено мандат од граѓаните да го браниме Уставот и Законите и да ги застапуваме нивните интереси во Собранието“, изјави Игор Ивановски на денешната блокада организирана во знак на револт против режимот на Груевски.
Но, рече Ивановски, по насилното и брутално исфрлање на опозициските пратеници од Законодавниот дом режимот, таквото делување го оневозможи, а Собранието во овој состав постои само на хартија, бидејќи режимот ја суспендира парламентарната демократија.
Затоа, рече, ќе продолжиме да ги браниме интересите на граѓаните и демократијата, но надвор од институциите, кои неповратно го изгубија својот легитимитет, се додека истиот не се поврати, преку слободни и фер предвремени парламентарни избори.
„Остануваме доследни на својата примарна цел – враќање на демократијата во земјата и како што гледате од таа цел нема да отстапиме“, додаде Ивановски.
Од ВМРО-ДПМНЕ нема никаква најава за можна средба.
„Ако власта продожи вака и има намера да влезе во сценарио за локални избори без опозицијата сите длабоки последици по државата ќе бидат на сметка на власта“, рече Ивановски.