Ние сме луѓе од збор и држиме до тоа што сме го кажале. Затоа ќе имаме чист образ, доколку ја добиеме вашата доверба, повторно да доаѓаме меѓу вас. Од вашиот глас зависи каква Македонија ќе имаме, порача Ѓорге Иванов, претседателскиот кандидат на Коалицијата „За подобра Македонија“ предводена од ВМРО-ДПМНЕ на вчерашниот митинг во Кочани.
Тој посочи дека во изминатите пет години од неговиот прв мандат покажал дека ги претставува сите граѓани и оти никогаш не правел разлика на етничка и религиозна основа.
– Претседателот е тој што обединува и што ја претставува државата. Кога сме обединети и силни, тогаш и другите не почитуваат, рече Иванов.
Нагласи дека за време на кампањата заедно со тимот за Македонија поминале илјадници километри.
– Ги посетивме сите општини. Бевме во многу села. Имавме средби со илјадници граѓани на Република Македонија. Разговаравме со нив. Видовме што оставила транзицијата низ Македонија, но видовме и оптимизам меѓу граѓаните на Република Македонија. Затоа што прават разлика, каква беше Македонија пред 10 години, и каква е Македонија денес, порача Иванов.
Знам, нагласи, дека има уште многу работа, дека многу треба да се вложи и дека многу проекти не очекуваат да ги реализираме. Но, граѓаните веруваат во тоа што го правиме и затоа ни ја даваат нивната доверба.
– Граѓаните препознаа дека се менува нешто во политиката во Македонија. Препознаа дека не сме ги изневериле нивните верувања, не сме го изневериле гласот што ни го дале пред пет години, или на претходните избори. Знаат дека сето она што било кажано, е реализирано. Знаат дека имаме чист образ, затоа што стоиме до нашиот збор. Дека не сме давале празни ветувања, и дека не сме зборувале убави зборови, туку знаат да не препознаат по нашите дела, рече Иванов.
Покажавме, додаде, дека, мора од вашите потреби и барања, да произлезат и нашите програми.
– Затоа поднесовме и јас и премиерот Груевски, отчет за сработеното. Но, поднесуваме и нови програми, кои произлегуваат од вашите потреби. Реални програми, кои имаат цел да ја менуваат Македонија. Но да ја менуваат на добро, порача Иванов.