Претседателот на Република Македонија, Ѓорѓе Иванов ги потпиша указите за прогласување на законите од областа на образованието, кои беа изгласани од парламентарното мнозинство.
Кабинетот на претседателот соопшти дека оваа мерка е резултат на извршените анализи и консултации, по кои е констатирано дека земјата има потреба од трансформација на високото образование и студенти и професори кои ќе бидат конкурентни на глобалниот пазар на знаење.
„Претседателот Иванов доби цврсто уверување од предлагачот на законите дека во наредниот период ќе биде организирана сеопфатна стручна расправа за најсуштествените прашања од сферата на високото образование со релевантните субјекти од оваа област, претставници на студентите и меѓународни експерти за високо образование. Од сите овие активности и инклузивен дијалог ќе произлезе целосно нов закон за високо образование“, стои во соопштението од Кабинетот.
Претседателот ги потпиша законите и покрај незадоволството на дел од студентите и професорите. На средбата со Професорскиот пленум, тој соопштил дека во овој случај ќе постапи како државник.