Претседателот на Република Македонија, Ѓорге Иванов, по повод 2 Август – Илинден, Денот на Републиката, упати честитка до граѓаните на Република Македонија и до сите Македонци ширум светот.
„Би сакал најсрдечно да ви го честитам 2 Август, Илинден – Денот на Републиката. Благодарение на двата Илиндена, 1903 и 1944, кои се светилникот на нашата борба за сопствена држава, денес имаме можност да живееме во демократска, независна Република Македонија.И по 109 години од Илинденското востание и 68 години од Заседанието на АСНОМ, идеалите на илинденците и на асномците се дел од нашето секојдневје и дел од визијата за нашата иднина – просперитетна Република Македонија, држава на рамноправни граѓани. Затоа со полно право денес имаме причина за славје и гордост. Празнувајќи го и овој Илинден во Република Македонија и насекаде низ светот, да им се заблагодариме и да им оддадеме почит на сите знајни и незнајни херои од нашата историја. Врз темелите што тие ги поставија опстојува современа и самостојна Република Македонија“, се вели во честитката за 2 Август.
Иванов порачува, во време на нови искушенија и предизвици,обединети и сложни да продолжиме посветено да работиме на изградба на модерно, просперитетно и европско општество.
Иванов ќе говори на собирот во Крушево, а претседателот на Собранието на Пелинце.