Граѓаните кои имаат имоти на трасата на новиот експресен пат Штип-Кочани од клучката кај штипската населба Три чешми до селото Крупиште можат да достават жалби и поплаки до Општина Штип до 11 септември. Портпаролот на Општина Штип, Драган Ристов на денешната прес-конференција истакна дека ова е втор повик до граѓаните за да ја искористат законската можност.
– Причина за овој наш втор апел е затоа што интересот за пријавување е слаб и досега за пет дена во Општина Штип се пријавиле само седум граѓани, а сигурни сме дека на споменатата траса има многу повеќе засегнати граѓани. Затоа укажуваме дека засегнатите граѓани кои имаат имоти или локации на трасата или во близина на истата и имаат во план да поднесат забелешка или жалба по истата врска со земјиштето да дојдат во Општина Штип и да пополнат формулар кој локалната самоуправа ќе го достави до Јавното претпријатие за државни патишта, вели Ристов.
Тој истакна дека одговорно лице за пополнување на формуларите и за постпката е Лазар Соколовски, а сите информации можат да ги добијат на телефон 078/476-685. Рокот за поднесување на жалби и поплаки граѓаните можат да достават до понеделник, 11 септември.