Општина Штип заврши со чистење на коритата на реките Брегалница и Лакавица.
Како што информира денеска раководителот на Одделението за инспекциски надзор Тоше Ѓорѓиев, со акцијата беа опфатени околу пет километри долж коритата.
– Се извадија средореците и падната маса која го попречува нормалното одводнување на Брегалница, особено при зголемување на водостојот. Се средија целото нејзино корито и критичните места на Лакавица. При доаѓање на големи води нема да имаме проблеми со излевање од коритата, рече Ѓорѓиев.
Според него, при поголеми водостои на реките, акциите за чистење придонесуваат за заштитата на имотите на граѓаните кои се покрај речните корита.
– Изминатите седум до осум години, колку што трае владиниот проект за чистење, се покажа дека таму каде што речните корита се навреме исчистени и санирани, нема проблеми при надоаѓање на поголеми води и поплави, рече Ѓорѓиев.
Акцијата за чистење на двете речни корита чинеше еден милион денари, а Министерството за животна средина обезбеди 2.000 литри нафта.