Трите медицински сестри и инфектолог од Инфективната клиника во Скопје, дале отказ и ќе работат во приватна болница, кажа министерот за здравство, Венко Филипче. Тој додава дека отказ најавила и шефицата на Одделот за инфективни болести во болницата „8 септември“, д-р Патриција Каламарас. Филипче вели дека дел од нив заминуваат бидејќи се преморени, а дел имаат лични причини.
„Имам информации дека една докторка, инфектолог, веќе дала отказ на Клиниката за инфективни болести и планира да замине да работи во приватна болница. А, исто така и докторката која што го раководеше инфективното одделение во болницата „8 септември“ најави, не знам дали е формализирано сето тоа. Јас разговарав со неа, но таа е решена да замине. Таму има други двајца инфектолози, размислуваме и веќе разговаравме за начинот на кој ќе се појача тоа одделение. Засега заедно со интернистите, имајќи го во предвид овој број на пациенти кој што е хоспитализиран таму и нашиот план да не се зголемува тој број, овие доктори се сосема доволни. Но, спремни сме да интервенираме со системот на ротација доколку е потребно било кое одделение да се поддржи“, рече Филипче.
Во однос на трите сестри од Инфективната клиника во Скопје, министерот вели дека тие одлучиле да заминат, а на нивно место, веќе други медицински сестри ги презеле функциите.