Актерот и шоумен Игор Џамбазов денеска го промовираше својот роман „Приказни од Мјаукедонија – исповед на една провинцијалка“ во гимназијата „Алгоритам“ во Скопје.
Џамбазов објасни дека неговата посета на „Алгоритам“ е во рамки на часот запознавање со позната личност. Оваа година, како што рече, откако се запознавме со директорката решив да го посетам училиштето и да ја донесам мојата книга.
– Книгата „Приказни од Мјаукедонија – исповед на една провинцијалка“ е прва книга на мојата мачка Емилија Џамвазова, со уметничко име Бавчанска. Тоа е всушност дневник за 2012 година што го води таа, во кој ни ги наоѓа сите маани и грешки што ние луѓето ги правиме на оваа планета и си ги правиме себе си, рече Џамбазов и додаде оти книгата е пишувана една година.
Потсети дека со „Приказни од Мјаукедонија – исповед на една провинцијалка“, во издание на издавачката куќа „Три“, беше застапен на годинашниов Саем на книгата.
– Младите купуваат книги и тоа особено ме израдува. Младите застануваа, се распрашуваа, ги прелистуваа книгите, прашуваа за цена, потенцира Џамбазов.
Тој додаде дека за две недели завршува со проектот „Бинго“, а од септември најави дека ќе продолжи со „Џиш“.
– Работам со мојот бенд, патуваме низ Македонија, свириме и создаваме нови песни. Почнав нова книга, рече Џамбазов.