И по оставката на Рашковски, Владата тврди дека од софтверот бенефит ќе имаат граѓаните

И покрај оставката на Драги Рашковски, Владата останува на ставот дека софтверот е набавен во транспарента постапка, како и дека тој е потребен, а институциите ќе го користат. Од Владата потврдуваат и дека денеска му е последен работен ден на Рашковски. „А1он“ се обиде да исконтактира и со поранешниот секретар за мониторинг и поддршка на институциите при реализација на програмата на Владата, но тој не одговара на повиците.

„Драги Рашковски достави до премиерот писмо со кое го известува дека се повлекува од функцијата. Тоа е негова лична одлука и има право на тоа. Владата во неколку наврати ги охрабри институциите да проверат дали се прекршени какви било процедури, правила, стандарди.  Уште еднаш потенцираме дека набавката на софтверот е спроведена во целосно транспраентна процедура, во целосна соглансост со законот за јавни набавки, институциите имаат потреба од тој софтверот за сообраќај, истиот е набавен по сума која била спуштена низ тендерската постапка, тој софтвер е тестиран, исправен, функционален и нашите институции ќе го користат, а банефит ќе имаат граѓаните и нивната безбедност“, велат од Владата за „А1он“.

Иако ја искоментираа набавката на софтверот, од Владата без став за зголемувањето на имотот на Рашковски за над 50 илјади евра откако тој си замина од функцијата генерален секретар на Владата.

Од Државната комисија за спречување на корупција кои ги истражуваат случаите поврзани со Рашковски, велат дека неговата оставка не влијае во работата и постапувањето во предметите.