Самостојниот синдикат на новинари и медиумски работници (ССНМ) денеска се солидаризираше и даде поддршка на професорите Крсте Шајноски, Маргарита Матлиеска и Александар Костадиновски, кои штрајкуваат со глад во Штип.
„ССНМ ја поздравува и одлуката на СОНК да им се приклучи на своите колеги и заедно да извршат јавен притисок врз ректорот на штипскиот универзитет „Гоце Делчев“ да го спроведе законот и решението на Државната просветна инспекција во кое беа утврдени неправилности во делот на критериумите за избор на професорите во оваа високообразовна институција. Бараме Наставно научниот совет итно да ја преиспита својата одлука да не ги прифати позитивно оценетите рецензии за тројцата професори со што ги загрози нивните работни места како вонредни професори на Економскиот факултет при Универзитетот „Гоце Делчев““, се вели во соопштението до ССНМ. Новинарскиот синдикат вели дека е згрозувачки тоа што денеска некои мора да го обрне вниманието на јавноста преку најрадикалниот штрајк – тој со глад.
„Разочарани сме и згрозени што за остварување на своите работни права универзитетските професори мораа да пристапат кон најрадикалната форма на протест, штрајк со глад и воедно апелираме до сите надлежни да го свртат вниманието и кон нивната здравствена состојба која сериозно се влошува“, се вели во соопштението од синдикатот на новинарите.