Освен извршната директорка на Хелсиншкиот комитет, покана за информативен разговор во МВР добила и универзитетската професорка Мирјана Најчевска. Според неа, поканата на која стои „Давање изјава во врска со дело сторено при демонстрации“ е обид да се заплашат сите оние кои протестираат.
Таа за А1он вели дека ова е вршење притисок на сите оние кои го искажуваат незадоволството, особено за аболицијата со која им е простено на големи криминалци.
– Ова го сметам како дискриминација, од ова произлегува дека сите оние кои се спротивставуваат ќе бидат казнети, а оние кои прават невиден криминал ќе бидат помилувани, вели Најчевска.
Шарената револуција маршира низ улиците на речиси сите градови во Македонија повеќе од еден месец, а камерите на МВР ги следат демонстрантите во секој чекор, особено при боењето на државните институции, згради, кои како што тие на повеќе наврати истакнуваат, се на граѓаните, а не на некоја политичка елита.
Александар Тодески
