Над 15 тони храна, вода, средства за хигиена, тоалетна хартија, постелнини, ќебиња, облека и обувки е хуманитарната помош што жителите и бизнис заедницата на Општина Илинден ја обезбедија за жителите на настраданите подрачја од поплавите што ја зафатија нашата земја.
Во изминатите два дена Општина Илинден ја организираше хуманитарната акција „Да ја покажеме хуманоста на дело“ во која граѓаните, стопанските субјекти, месните заедници, спортските клубови, невладините здруженија, јавните општински претпријатија донираа средства за поплавените.
Собраната хуманитарна помош, како што соопшти општина Илинден, во соработка со компанијата „Дени Интернационал“, е транспортирана во Пелагонискиот регион, во општина Новаци.