Хуманитарна помош во прехранбени продукти и вода од Република Бугарија денеска пристигна за мигрантите сместени во транзитниот центар кај Табановце.
За донацијата, која е на иницијатива на бугарскиот премиер Бојко Борисов, а е обезбедена во соработка со бугарскиот Црвен крст и бугарски компании, се заблагодари министерката за труд и социјална политика Фросина Ташевска-Ременски.
Таа денеска оствари средба со Анжелина Тотева началник на политичкиот кабинет на премиерот Борисов, во присуство на Иван Петков, амбасадор на Бугарија во Македонија, при што ја прими донацијата.
Ташевска-Ременски потенцираше дека секоја помош е добредојдена и дека примерот на Република Бугарија треба да го следат и другите.
Според Тотева, нивната Влада внимателно ја следи состојбата со мигрантите во Македонија и во случај на неопходност Софија ќе продолжи да помага според можностите.
За амбасадорот Петков испраќањето на оваа хуманитарна помош е израз на солидарноста на премиерот Борисов и на бугарската држава кон немоќните луѓе.
Министерството за труд и социјална политика добиената донација ќе ја предаде на Црвениот крст на Република Македонија, кој ќе ја менаџира дистрибуцијата на терен.