Известувачот на ЕП за Македонија Ричард Ховит денеска во Скопје има средби со македонскиот државен врв и со претставници на политички партии.
Во изјава за медимуите, тој вчера ја нагласи важноста на неговата посета која се случува, како што вели, во чувствителен момент за земјата.
– Јас на сите партии гледам исто, не од аспект на тоа дали некоја од нив е во позиција или во опозиција. Прво сакам да ги видам нив, а потоа да ја одиграм мојата улога како известувач на ЕУ и да им пренесам за последиците на земјата во процесот на пристапување, не за тоа како партиите се однесуваат меѓу себе или на планот на внатрешната политика. Одреден сум за тоа и имам улога во процесот на приближување кон ЕУ, рече Ховит.
Според него, сликата за земјава, која неколку пати доби препорака за старт на преговорите за членство, сега е усложнета и најави оти ќе се обиде за време на посетата, да ја поправи таа слика.
– Мојата порака е дека во иднината ние ќе се сретнеме во ЕУ. Ова е критично и чувствително време за вашата земја и за односите на вашата земја со ЕУ. Ќе бидеме со вас, ќе ве слушаме и ќе водиме дијалог со вас. Сигурен сум оти ќе бидете на моја страна и бидете сигурни дека јас ќе бидам на ваша страна. Следните недели и денови се тешки и се што треба да се направи ќе се направи, рече Ховит.
Следната недела во земјата се очекува да допатува и еврокомесарот за проширување Штефан Филе, во врска со подготовката на пролетниот извештај за земјата и активностите во рамки на Пристапниот дијалог на високо ниво.