„Нон-пејперот“ со кој се бара до идната пролет да се одложи почетокот на преговорите со Македонија е иницијатива на Франција и Холандија. Токму за ова неофицијално во Софија се вршело притисок од другите членки врз Франција и Холандија да попуштат.
Според Владата, мнозинството земји членки на ЕУ поддржуваат почеток на преговорите со Македонија, после решавање на спорот со Грција, но дека истовремено постои и дебата во ЕУ околу подготвеноста за ново проширување.
„Суштинските и коренити промени во земјата градат силни и услужни институции, праведна држава и силна економија за подобар живот на сите граѓани.
Македонија е на вистинскиот пат, а темелните реформи се признаени и препознаени од цела Европа и од сите земји членки на ЕУ. Сите земји членки на ЕУ сметаат дека Македонија треба да продолжи по овој пат и да го интензивира прогресот. За тоа говори и последната оценка на Европската Комисија со која Македонија е оценета за најдобра во регионот на Западниот Балкан и Турција за спроведување на препораките во економската програма за реформи.
Македонија после решавање на спорот околу името веднаш ќе стане членка на НАТО и со тоа уште позабрзано и поодлучно ќе ги отвори портите на ЕУ“ се вели во ставот на Владата.