Изградбата на Коридорот 8 и на автопатот Скопје – Блаце ќе биде приоритет на Демократската унија за интеграции во следната година во делот на патната инфраструктура, изјави денеска заменик-министерот за транспорт и врски Ниметула Халими по средба со функционери од ДУИ на која ги анализираа постигнувањата во ресорите што ги раководат и планираните идни активности.
На средбата присуствуваа министерот за економија Беким Незири, директорот на ЈП МЖ Инфраструктура Ирфан Асани, како и пратеници од ДУИ во Собранието.
Заменик-министерот Халими информира дека го претставил прогресот во тековните инфраструктурни проекти истакнувајќи ги делницата Кичево – Струга, како и планираната изградба на патот Требеништа – Струга, за кои се подготвува техничка документација, а во кои ќе бидат вложени 45 милиони евра.
– Инвестициите во патната инфраструктура на Коридорот 8 достигнаа 390 милиони евра, а во железничката инфраструктура 70 милиони евра, истакна Халими.
На средбата станало збор и за активностите во комуналната инфраструктура. Општините Тетово, Липково, Гостивар, Желино, Струга, Теарце, Брвеница и Чаир, како што рече Халими, ги исполнија условите за користење грант во вредност од 6.750.000 евра од Европската инвестициска банка. Претставени се и проектите од станбената политика што ги спроведува Министерството за транспорт и врски за изградба на станови за социјално ранливи категории, за млади брачни двојки, лица со посебни потреби, самохрани родители… Досега, според Халими, се изградени 13 објекти со 660 стана, а годинава почна и изградба на станови во Гостивар и во Велес. Од 2016 до 2018 година е предвидено да се градат над 800 станови во општините Бутел, Сарај, Дебар и Куманово.
Како што информира заменик-министерот Халими, на средбата се презентирани и неодамнешните измени на Законот за постапување со бесправно изградени објекти со кои се продолжуваат роковите за доставување геодетски елаборати на досега поднесените барања за легализација, а се продолжува и рокот за поднесување нови такви барања.