На Свечената академија по повод одбележувањето на Денот на македонската револуционерна борба во Македонската опера и балет Груевски кажа дека 23-ти октомври е еден од најсветлите датуми на македонската историја, ден на создавањето на Македонската револуционерна организација која во колективната меморија на македонскиот народ е запишана како ВМРО – Внатрешна македонска револуционерна организација чиј прв претседател бил Христо Татарчев.
„ВМРО со времето прераснала во историски препознатлив код на македонскиот народ. Нејзиниот од по тешките балкански крстосници е нераскинлив дел од нашата судбина“, рече Груевски.
На овој ден, истакна тој, досега сме кажувале многу работи, сме говореле за минатото и за иднината, за предизвиците, за поразите, за проблемите и победите. Сме говореле за нашите херои од минатото кои ги водеа визиите и идеите, храброста и одлучноста, посветеноста и определбата за една кауза која се вика македонска држава.
„Тие луѓе ги дале своите животи за тоа за што верувале. Имале цел и идеја водилка. Не се плашеле да застанат на патот на што било или кого било, верувајќи во исправноста на тоа што го прават, за доброто на нашиот народ. Нивниот пример треба да биде наш, нивната волја страст, енергија, верба, треба да остане општ кодекс на однесување кога е во прашање нашата држава и интереси“, изјави Груевски.
На свечената академија присуствуваат претседателот на Република Македонија Ѓорѓи Иванов, претседателот на македонското Собрание Трајко Вељаноски, претставници на Владата, на судската власт, на јавниот живот и граѓанскиот сектор.