Ветувањето за зголемување на пензиите и социјалната помош го исполнивме. Веќе од утре новите пензии што ќе почнат да се делат се зголемени, онака како што ветивме. А, во минатите неколку дена почна исплатата на социјалната помош зголемена за пет проценти, онака како што ветивме. Тоа е држење до дадениот збор, истакна денеска премиерот и лидер на ВМРО-ДПМНЕ Никола Груевски.
На денешното претставување на кандидатите за градоначалници и на носителите на советничките листи за Градот Скопје и скопските општини потсети дека ова ветување било дадено пред стопанските комори во септември минатата година. Пред стопанствениците беше ветено и дека до крајот на февруари Владата целосно ќе го елиминира доцнењето за поврат на ДДВ и на средствата од извршени услуги на компаниите, што на 28 минатиот месец, како што рече, беше целосно реализирано.
– На истото тоа обраќање дадов јавно ветување дека од март ќе има зголемување на пензиите и на социјалната помош, рече Груевски истакнувајќи дека ВМРО-ДПМНЕ е партија која ветува, делува и има дела.
Единствената дилема кај зголемувањето на пензиите, како што рече, била дали нивната исплата да биде линеарна или според точно утврден процент.
– По консултација со пензионерските друштва се одлучивме на линеарна по 550 денари поголема пензија за секој пензионер во Македонија, што претставува месечно околу 2,5 милиони евра повеќе средства за пензионерите или годишно безмалку 30 милиони евра повеќе за пензионерите секоја година. Тоа е ветено и остварено. И по тоа се разликуваме од нашите политички конкуренти, рече Груевски, додавајќи дека ВМРО-ДПМНЕ има вредности и принципи до кои држи и од кои не отстапува.
Имаме чест и одговорност, додаде, утре да не се засрамиме и да можеме граѓаните да ги погледнеме во очи.
– За разлика од нас, нашите противници како да се натпреваруваат меѓу себе кој нема да успее во некое ветување и така во нивната хиерархија да се искачи погоре. За разлика од нив ние сме групација која што држи до дадениот збор, додаде лидерот на владејачката ВМРО-ДПМНЕ.