Експремиерот Никола Груевски бара одложување на двегодишната затворска казна за набавката на луксузниот „мерцедес“.
За молбата адвокатскиот тим на Груевски да не оди во затвор, судијата за извршување на санкции има рок од три дена да одлучи дали ќе ги уважат наводите во молбата и ќе го одложат заминувањето на Груевски во затвор.
Ова адвокатите го образложуваат со неопходноста Никола Груевски да го заврши пратеничкиот мандат. Во членот 89, став 1, точка 4 од Законот за извршување санкции меѓу причините за одложување на издржување на затворската казна стои: Ако осуденото лице е обврзано да изврши одредена работа што веќе ја започнало, а поради неизвршувањето на таа работа би настапила позначителна штета.
Прашање е каква штета може да настапи, кога, доколку се погледне Извештајот за работата на пратениците, Никола Груевски за речиси две години, само неколку пати се појавил во собраниската сала. Еднаш при обраќањето на Столтенберг, при гласањето за Законот за јазици кога предизвика инцидент и ја истури чашата врз списите на претседателот на Соббранието Талат Џафери, при отворањето на постапката за измени на Уставот поради што бараше и одложување на судско рочиште и кога се гласаше за започнување на процесот.
Во периодот од јануари до јуни 2018 година само три пати присуствувал на седници, има 31 оправдано и 21 неоправдано отсуство и само еднаш дискутирал, ниту еднаш на работно тело и гласал само еднаш.
Од јули до декември 2017 година Груевски само еднаш дошол во Собранието, има 68 оправдани и 9 неоправдани изостаноци, ниту еднаш не се јавил за збор на седница и работно тело, и ниту еднаш не гласал.
Груевски има надеж и од Врховниот суд на Јово Вангеловски каде се бара вонредно преиспитување на пресудата, но тоа не го одлага извршувањето на казната. Врховниот суд нема рок до кога треба да ја донесе одлуката.
За потсетување Врховниот суд веќе има донесено одлука за одложување на казната затвор за поранешниот премиерот Владо Бучковски за случајот „Тенковски делови“, кој беше осуден на три години затвор.