Вицепремиер и министер за политички систем и односи меѓу заедниците Артан Груби денеска оствари средба со претседателот на Републиканската партија на Албанија и поранешен министер за одбрана Фатмир Медиу.
Двајцата соговорници, како што соопшти Кабинетот на Груби, разговараа и за политичката состојба во Република Северна Македонија и Република Албанија, како и за други важни настани во регионот.
Груби и Медиу, како што се наведува во соопштението, разменија мислења и за соработката помеѓу Северна Македонија и Албанија со Соединетите Американски Држави, особено во областа на 5G мрежата, иницијативата „Три мориња“ и конструктивната и интензивна комуникација со нашите заеднички американски пријатели.
-Груби и Медиу оценија дека Република Северна Македонија и Република Албанија, како две земји-членки на НАТО, се движат во вистинска насока и дека целосно заслужуваат започнување на преговорите за членство во Европската Унија, стои во соопштението.
Вицепремиерот Груби и Медиу разговараа и за потребата од одржувањето на првата заедничка меѓувладина конференција на Северна Македонија и Албанија со Европската Унија, конференција која што ќе го означи официјалниот почеток на преговорите за членство во ЕУ.