Поранешниот вицепремиер Артан Груби денеска е спроведен на распит во Основното јавно обвинителство, откако претходно помина неколку часа во истражниот затвор „Скопје“ во Шутка.
Груби беше приведен на граничен премин по неговото враќање во земјава, по повеќе од една година престој во странство. За него претходно беше определена мерка притвор во отсуство.
Истрагата што ја води скопското Обвинителство се однесува на сомнежи дека како раководител на владина седница го одобрил барањето на Државна лотарија за јавна набавка на ВЛТ-терминали, иако, според наводите, институцијата немала законско право самостојно да организира игри на среќа. Тој е осомничен за кривично дело „проневера во службата“.
Од Обвинителството најавуваат дека по распитот ќе информираат за понатамошните чекори во постапката.
