Комисијата за проценка на штетите настанати од природни непогоди при Општина Штип започна со постапката за прием на пријави за притрпени штети предизвикани од невремето што викендов го зафати атарот околу реката Крива Лакавица.
Рокот за пријавување штети од невремето е до 5 јуни (петок), по што екипи од Одделението за проценка на штети ќе излезат на терен за да ја утврдат фактичката состојба.
Од одделението информираат дека во текот на денешниов ден граѓаните најчесто се информирале за потребната документација што треба да ја достават, како и за крајниот рок за поднесување на пријавата. Денес се поднесени околу петнаесет пријави, кои главно се однесуваат на штети врз земјоделските посеви.
Општината сè уште ги нема исплатено средствата за штетите што ги претрпеа граѓаните од поплавите што го зафатија Штип кон крајот на месец февруари оваа година. Жителите на лаквичкиот регион се надеваат дека нив нема да ги снајде ваквата судбина, бидејќи во спротивно ќе се најдат на работ на егзистенцијата.
М.Р.