Градоначалникот на општина Струмица Зоран Заев присуствуваше на традиционалната тортијада која во организација на здружението на лицата со телесен инвалидитет „Мобилност“ викендот се одржа во хотелот „Цар Самуил“ во Банско.
На петнаесеттата тортијада учествуваа околу триесет членови на 13 здруженија од Македонија и гости од Бугарија и Србија.
Од вештите раце на лицата со телесен инвалидитет беа направени тринаесет прекрасни торти преку кои упатија заедничка порака дека и тие можат и умеат како и сите други во заедницата. Истовремено, се одржа и осумнаесеттото издание на музичките средби на лицата со телесен инвалидитет од Македонија.
Добредојде од името на општината на присутните им посака градоначалникот Зоран Заев и им се заблагодари што остануваат верни на традицијата и овие средби ги одржуваат во Банско.
Посакувајќи им многу здравје, среќа и успеси на сите полиња на членовите на здруженијата од цела Македонија, тој изрази надеж дека Струмица и во иднина ќе ја има честа да биде домаќин, но и помагател на овие манифестации.
