„Градоначалникот на Битола, Владо Талески, му забрани на ЦИВИЛ да одржи настан во рамките на Иницијативата „Социјална правда сега!“, уредно најавен во јавноста, како и во битолската полиција. Образложението на Талески не можеше да биде поевтино. Наводно, просторот е зафатен од Битфест, кој започнува на 25 јуни.
Инаку, зборуваме за не повеќе од два квадратни метри, колку што зафаќаат масичката за проекторот и платното за проекција, потребни да се одржи овој настан.
Ова е неприфатливо однесување на локалниот моќник во Битола, кој очигледно не е заинтересиран за социјалната правда во неговата општина, а кон јавниот простор се однесува како да е негов приватен двор“, велат од ЦИВИЛ.
„Талески, кои се вистинските мотиви за забраната за одржување на овој двочасовен настан на ЦИВИЛ?
Досега, во рамките на Иницијативата „Социјална правда сега!“ ЦИВИЛ одржа настани во Штип, Кавадарци, Велес, Скопје и други градови, а утре ќе одржи настан во Прилеп.
За 15 години, колку што постои, на ЦИВИЛ никогаш не му бил забранет ниеден јавен настан. Талески ќе го запомниме по оваа дрска забрана“, се вели во соопштението на ЦИВИЛ.