Претставници на повеќе служби на охридската локална самоуправа, предводени од градоначалникот Никола Бакрачески, како и на месната заедница на селото Пештани, денеска извршија увид во градежните активности за уредување на кејот на познатата туристичка населба на источниот брег на Охридското Езеро.
– Од она што може да се види, привршуваат активностите за уредување на кејот. Потпорниот ѕид е изграден, следуваат инфраструктурни и активности за хортикултурно уредување, со што Пештани ќе добие убаво уредено шеталиште покрај езерото, рече Бакрачески.
Задоволни се и жителите на Пештани, кои се надеваат дека локалната самоуправа ќе помогне во решавање и на останатите проблеми со кои се соочува населението во месната заедница.
– Задоволни сме од изградбата на потпорниот ѕид, одамна ова го баравме поради поплавите кои се случуваа. Очекуваме од локалната самоуправа да се уреди и плажата во Пештани, да се обезбедат чамците, изјави Љубе Бубески од месната заедница.
