На граничните премини Богородица и Табановце има зголемена фреквенција на возила, каде чекањата се од 30 минути до 1 час. На останатите гранични премини нема подолготрајни задржувања, информира АМСМ.
Состојбата е очекувана, бидејќи продолжениот празничен викенд многумина од земјава ќе го искористат за сончање и капење на морските плажи во соседството, а некои од нив и порано го почнале одморот, спојувајќи го со викендот.
За потребите на проектна документација за рехабилитација на патниот правец А-1 делница Миладиновци – Куманово во двата правци се врши геодетско снимање на споменатиот патен правец, поради што се препорачува крајно внимателно управување со возилата поради присуство на работници на патот.
На патниот правец Прилеп – Градско, 1 км пред тунел Фариш, сообраќајот се одвива наизменично по една коловозна лента во должина од 200 метри. Поставена е соодветна светлосна сигнализација за регулирање на сообраќајот.
Поради оштетување на коловозот на патен правец Маврово – Дебар во близина на Бошков мост сообраќајот се одвива во две ленти преку бајпас додека траат санациите на оштетената коловозна лента.
Интензитетот на сообраќај на патните правци надвор од градските средини е зголемен.