Медиумската слобода како основно човеково право и важен фактор за демократијата и проблемите со кои се соочуваат медиумите и новинарите во земјите од Југоисточна Европа, но и пошироко, се главните теми на кои ќе се дебатира на дводневната петта Годишна медиумска конференција за Југоисточна Европа што денеска и утре се одржува во Струга во организација на ОБСЕ.
На конференцијата ќе стане збор за безбедноста на новинарите како апсолутен предуслов за слободни медиуми, за физичките и вербалните закани кон нив, за се позачестеното хакирање на информативните портали и за начините за креирање слободни и безбедни услови за работа на медиумите и новинарите.
Ќе се дебатира и за проблемот со лажните вести, пропагандата и дезинформирањето кои се присутни во регионот, за економската сигурност на новинарите, ниските примања, социјалната несигурност и работата без правни договори, како и за цензурата и самоцензурата.
Учесниците меѓу кои и новинари, претставници на граѓански организации, на академската заедница, на предвидените панел дебати ќе дебатираат и за регулацијата или саморегулацијата на медиумите, за добрите пракси на јавните сервиси. Меѓу говорниците на дводневната конференција во Струга се најавени и претставникот на ОБСЕ за слобода на медиумите Харлем Дезир, министерот за комуникации, отчетност и транспарентност Роберт Поповски, директорот на Европската федерација на новинари Ренате Шредер, извршниот директор на Б92 Вера Матиќ, претседателот на ЗНМ Насер Селмани, како и повеќе директори и главни уредници на медиуми од Македонија и земјите од регионот.