Технолошко-индустриска развојна зона во близина на локалитетот Аџитепе, поддршка за постоечките индустриски зони, како и формирање економски каталог се дел од мерките опфатени во програмата за локален економски развој кои ги промовираше кандидатот за градоначалник за Куманово, од ВМРО-ДПМНЕ, Зоран Ѓорѓиевски денеска во кумановско Доброшане.
– Една од мерките што ја имаме во програмата за локален економски развој, покрај најавената ТИРЗ зона во локалитетот на Аџитепе е помагање на веќе постојните „диви“ индустриски зони со нивно инфраструктурно доуредување со сообраќајно-технички решенија, преку промоција со одредени табли за сите овие фирми со цел за нивна поуспешна работа, за нивна поголема промоција и зголемување на постојните капацитети и за намалување на невработеноста, изјави Ѓорѓиевски.
Тој најави подготовка на економски каталог, во кој ќе бидат опфатени сите компании во Куманово, со потенцирање на нивните капацитети, човечките и природните ресурси на градот Куманово, со што заинтересираните потенцијални странски инвеститори ќе имаат информации за економската состојба во градот.