По барање на граѓаните, идејниот проект за улицата „Мирослав Крлежа“ во Дебар Маало ќе има измена. На покана на градоначалникот на Општина Центар, Горан Герасимовски, жителите вчера беа во салата на Советот, каде го погледнаа идејниот проект и детално го дискутираа. Овој пристап на соработка со граѓаните се покажа како позитивен, затоа што улицата „Мирослав Крлежа“ ќе претрпи измени во проектната документација според потребите на граѓаните, известува Општината.
„Вечерва ве поканив во општината затоа што сакав да го видите идејниот проект за улицата ‘Мирослав Крлежа’, по кој сакам заедно да дискутираме. Сакам да го чујам вашето мислење и ако е потребно, да го прилагодиме ова решение пред да почнат активностите. Подобро е да изгубиме шест месеци, но да добиеме проект кој ќе биде функционален и според вашите интереси“, рече Герасимовски пред граѓаните.
Герасимовски соопшти дека општината има поднесено известување до ЈП „Градски паркинг“, дека на улицата „Мирослав Крлежа“ во тек е постапка за реконструкција, поради што треба да биде ослободена од поставените знаци на тротоарските површини и по реконструкција, таа ќе стане резидентна за станарите. Вакво барање е поднесено и за улицата „Ленинова“.
Герасимовски исто така истакна пред секоја реконструкција дека ќе го практикува овој принцип на блиска соработка со граѓаните.
„Идејата е направиме подобри проекти заедно со граѓаните. Јас во предизборниот период неколкупати најавив вклученост на граѓаните при реализација на проектите и тоа ќе го исполнам. Мојата цел е заедно да реализираме подобри проекти кои во целост ќе ги исполнуваат интересите на граѓаните“, се изјасни Герасимовски.