Кандидатот за градоначалник на Гази Баба, Борис Георгиевски и министерот за земјоделство шумарство и водостопанство Љупчо Николовски вчера остварија средба со граѓаните на Синѓелиќ и Инџиково.
Георгиевски пред нив ја истакна важноста од изградбата на каналскиот систем за отпадни води во Инџиково, редовното чистење на каналите во Синѓелиќ, како и негово трајно покривање.
Министерот Николовски истакна дека овој дел од општината располага со голем земјоделски потенцијал кој треба да се искористи.
Тој им соопшти на граѓаните дека субвенциите ќе се исплаќаат на време и ќе се доделуваат на вистинските земјоделци во периодот кога ќе им бидат најпотребни.
Владата на СДСМ ќе се залага за праведно распределување на субвенциите за тие да стигнат кај вистинските земјоделци. Дополнително ќе бидат субвенционирани и втори култури каде условите тоа го овозможуваат.
Николовски порача и дека ќе се прави ревизија на веќе доделеното државно земјиште со цел да се провери дали тоа им припаѓа на вистинските земјоделци.
