Новата македонска Влада имаше импресивен почеток и се фокусира на соработка со соседите преку амбициозни реформскии проекти и позитивни чекори, истакнал германскиот министер за надворешни работи на средбата со шефот на македонската дипломатија Никола Димитров вчера во Берлин.
Габриел, како што соопшти денеска геманското МНР, му ги пренел на Димитров честитките за првите 100 дена на Владата на премиерот Зоран Заев.
– Сега е клучно најавените реформи да се спроведат, а реформскиот процес во Македонија повторно да добива во интензитет. Само на тој начин Македонија може да напредува на патот на евро-атлантското приближување. Исто така, сакам да апелирам до актуелната опозиција да не го блокира добриот почеток на новата влада и да не одбива конструктивна соработка со владата. Бидејќи, сето тоа ќе биде за добро не само за ЕУ перспективата, туку и за граѓаните на земјата, кои се надеваат на напредок и подобрување на нивната животна ситуација, порачал Габриел.
Тој ја нагласил поддршката на Германија за евроатлантската перспектива на Македонија, како и на другите држави од Западен Балкан, која не е само политичка, туки и практична, со совети и дела, посочувајќи го како пример Берлинскиот процес.
– Заедно со нашите партнери во ЕУ, работиме на интензивирање на нашата поддршка. Во исто време, сепак, нема да има отстапки за време на процесот на пристапување. Реформите треба да се спроведат, нагласил шефот на германската дипломатија на средбата со македонскиот министер за надворешни работи Никола Димитров.