Преку целиот ден се интензивира праќањето смс пораки по членството на ВМРО-ДПМНЕ но и кај вработени во администрацијата за присуство на собирот на ВМРО-ДПМНЕ во недела во салата Борис Трајковски.
Пораките се со патриотски набој, дека со присуството ќе се даде поддршка на националните интереси и ќе се штити државата. Од кого и што не е објаснето. Во А1он пристигнаа пораки од неколку членови, кои ги добиле од општинските комитети, и велат дека цел ден им пристигнуваат на нивните телефони.
-Големината на Македонија лежи во нејзините луѓе, длабоко во нашите корени, во секој еден од нас. Уште еднаш да ја покажеме големината на Македонија и цврстата решителност на ВМРО-ДПМНЕ за чување и одбрана на националните и државните интереси. Ве покануваме утре недела, во 12 часот во спортската сала Борис Трајковски на голем собир од каде ќе се испрати јасна порака за иднината на државата, пишува во една од пораките исраќана во Прилеп.
Пред два дена во Битола пак се праќаа пораки со кои се инсистираше на задолжително присуство на сите вработени во администрацијата.
Јове Кекеновски како актуелен член на ВМРО-ДПМНЕ посочи дека собирот во недела е само очаен обид на Груевски да покаже дека сеуште ја има контролата врз партијата,а дека луѓето се носат со притисоци и закани во Скопје.
Т.Ц.