Општина Центар работи на расчистување на остатоците од потпорниот ѕид кој се урна во четвртокот, во дворот на градинката „Кочо Рацин“ – клон Панорама.
Надлежните во општина Центар најавија дека ќе пристапат кон кршење на остатоците од ѕидот, дури и оној дел што е напукнат ќе се урне комплетно и веднаш ќе се пристапи кон изградба на нов, сериозно армиран потпорен ѕид со појаки темели.
Ако се оди според планираното и согласно временските услови, санацијата ќе биде извршена за десеттина дена.
По уривањето на ѕидот, градоначалникот на општина Центар, Андреј Жерновски кажа дека ќе стави крај на урбаното дивеење на Водно.
-Ова веќе тринаесет години ја доведува во опасност стабилноста на мегаломанските објекти и сигурноста на жителите.
Општина Центар веќе стапи во контакт со катедрата за геомеханика при Градежниот Факултет во Скопје, за да се изработи студија за геомеханичката стабилност на областа Тасино Чешмиче, а од ИЗИС ќе се побара анализа за носивоста и за живоста на земјиштето, соопштуваат од општина Центар.