Во текот на вчерашниот ден штипјани можеа да го проследат „Велосипедскиот маратон“, кој во соработка со дел од детските градинки и основните училишта го организираше Општина Штип по повод Неделата без автомобили.
Учество во маратонот зедоа децата од детската градинка „Вери Циривири-Трена“, ученици од основните училишта, како и претставници од Здружението на пензионеритена Штип и Карбинци, кои на сите граѓани сакаа да им ја пренесат пораката дека, сепак, сите генерации можат да бидат дел од светот без автомобили.
Маратонот започна пред детската градинка „Вери Циривири Трена“, а учесниците поминаа две маршрути.Најмалите на велосипед минаа дел од улиците „Христијан Тодоровски-Карпош‘‘ и „Генерал Михајло Апостолски“, по што повторно се вратија во дворот на градинката, додека, пак, повозрасните го заобиколија целото градско подрачје.
По завршувањето на маратонот учесниците имаа можност да проследат едукативни предавања за безбедноста во сообраќајот и за укажување прва помош.
Учество во реализацијата на оваа манифестација зедоа и Советот за безбедност во сообраќајот, Здружението на пензионерите на Штип и Карбинци, Црвениот крст и Одделението за превенција при СВР-Штип.
М.Р.