И додека јавноста се згрози од вчерашното насилно влетување со џип на протестот на опозицијата и повредувањето на три лица, СДСМ денеска го обелодени неговиот идентитет. Се работи, велат од СДСМ за Валентин Ѓорѓиески, човек, близок на ВМРО-ДПМНЕ и на градоначалникот Марјан Ристески.
На сликите кои ги објавија се гледа Ѓорѓиески рамо до рамо со челниците на ВМРО-ДПМНЕ од Прилеп.
„ Со вакви лица, слепи партиски послушници, ДПМНЕ се обидува да ги попречи протестите на опозицијата и да го заплаши народот. Пипките на режимот се спуштија и на најниско локално ниво. Партиските војници на ДПМНЕ добиваат наредби од врвот да создаваат нереди и инциденти со цел да ја искриват сликата за мирните протести на опозицијата. Дали токму Марјан Ристески, Миле Јанакиески и Ана Лашкоска, кои се сликани со монструмот кој ладнокрвно влета во толпата, се нарачателите на овој грозоморен чин? Јавноста има право да знае и сама да процени кој е сторителот, а кој нарачателот на вчерашниот обид за убиство “, укажуваат од СДСМ.
