Припадници на Министерството за внатрешни работи, денеска на кејот на Охридското Езеро преку симулација ги презентираа вештините кои ги усовршија на специјалистичката обука во Охрид за спасување на давеник во вода и укажување прва помош. Обуката за спасување давеник во вода ја спроведоа сертифицирани инструктори од Црвениот крст – Охрид, додека пак обуката за укажување прва помош ја реализираа инструктори од Англија.
Оваа обука значително ќе придонесе во професионалното ефикасно и ефективно справување на полициските службеници со случаи на давеници во водите на Охридското Езеро и навремено давање на прва помош. Инаку, полициските службеници од граничната полиција се во постојан едукативен процес. Целта е да се обезбеди максимална безбедност на вода и мирно лето за охриѓани, но и за туристите во градот. Ние како полиција сме во постојана комуникација и соработка со Црвениот крст и спроведуваме вакви проекти – истакна Стефан Димоски, портпарол на СВР Охрид.
Претседателот на Црвениот крст од Охрид, Сашо Точко додаде дека соработката со „Флоријан“ од Англија години наназад дава резултати што помогнала и при обуката на полициските службеници. Тој додаде дека обуките во соработна со полицијата траат во текот на целата година и заедно во летниот период се грижат за безбедноста на пливачите во Охридското Езеро.
Години наназад соработката со „Флоријан“ ја крунисуваме со еден вид обука и соработка со припадниците на граничната полиција, езерската полиција и воопшто со полицијата. Проблематиката која што ја обработуваме е безбедност на вода, спасување на давеници од вода и укажување на прва помош. Проблематика која што постојано се менува, постојано се надоградува и затоа ги користиме овие ресурси на инструкторите од Англика кои секоја година доаѓаат овде. Обуките се навистина квалитетни, обучивме голем број на припадници на полицијата. Преку целата година, нашите инструктори кои ги стекнале лиценците по највисоките стандарди вршат обуки за припадниците на граничната полиција – нагласи Сашо Точко, претседател на Црвениот крст од Охрид.
