Прилеп денеска постигна нов Гинисов рекорд. Ја направи најголемата перница со димензии 17,1 на 17,1 метар тешка околу шест тони. Ова и официјално го верификуваше претставникот на Гинисовата канцеларија во Лондон, Фортуна Бурке.
– Со оваа перница денеска е срушен досегашниот рекорд од 15 метри и поставен е нов Гинисов рекорд. Перницата е голема 17,1 метар. Му честитам на Прилеп. Атмосферата е многу убава, изјави Бурке.
Иницијативата за да се наполни перницата е на компанијата за постелнини „Комфи Ангел“ а со логистичка поддршка на локалната самоуправа. Перницата денеска попладне ја полнеа вработените во компанијата под надзор на верификаторот од Гинисовата канцеларија.
– Перницата ја наполнивме за неполни два часа со материјалот кој го користиме за производство на перниците во фирмата. Всушност, беа поставени повеќе од 1850 помали перници тешки над 3 килограми,изјави Ирена Јакимосјка, сопственичка на „Комфи Ангел“.
Според градоначалникот на Прилеп Марјан Ристески, градот веќе има искуство со ваквите манифестации. – Сакаме и овојпат да укажеме дека Прилеп и Македонија се посакувани дестинации за инвестирање, рече Ристески.
Привот Гинисов рекорд на Пирлеп е поставен пред пет години кога беа приготвени 80.191 посна сарма. Новиот рекорд – најголема перница, за неколку дена ќе биде и официјално впишан, рече преставникот на Гинисовата канцеларија Фортуна Бурке.