Општина Струмица со 2,6 милиони денари ќе ги поддржи здруженијата на граѓани во оваа 2013 година. Јавниот повик за прибирање проекти од областа на локален економски развој, социјална заштита, култура, образование, заштита и унапредување на животната средина, млади и младински политики ќе биде објавен на седми мај и ќе тече во наредните десет дена, информираше Тони Милушев раководител на одделението за Локален економски развој при општина Струмица на денешната средба со претставниците на здруженијата на граѓани.
– Општина Струмица во своите проограми, односно програмата G1 поддршка на ЛЕР, има планирано два милиони денари кои ги става на располагање на здруженијата на граѓани заради реализација на проекти од областа на локалниот економски развој вклучувајќи ги и културата, образованието, здравството и други проекти кои се однесуваат на локалниот економски развој во општина Струмица.
– Исто така и во програмата V2, програма за социјална заштита, има проектирано 600 илјади денари за здруженијата на граѓани кои работат на социјалната заштита. Намерата ни е општина Струмица јавно да ги информира сите здруженија на граѓани и воедно да ги покани додека трае јавниот повик да подготват свои проекти и да ги достават до одделението за Локален економски развој и во рамките на спроведувањето на процедурата, соодветна комисија ќе ги разгледува и ќе ги поддржи во рамките на утврдениот износ, рече Милушев.
Финансиската поддршка на здруженијата на граѓани од општина Струмица за оваа година година е дефинирана како мали грантови во висина до 120 илјади денари.
