Седум месеци поминаа откако власта најави дека конечно почнале активностите за изградба на стариот струмички театар, а исто толку време од фрлената лопата и црвените панделки со кои ја означи градбата. Сето тоа со публика, камери, ракоплескања, пофалби по медиумите, а од тетарот останаа само урнатините.
Статистички, тоа беше дури петто ветување за струмичани дека ќе се возобновува стариот театар, но сеуште ниту еден работник, ниту било каква механизација се нема појавено.
Ова засега е само уште еден објект од ветените во лопата-градежната преродба на оваа власт.
-Повеќе години изградбата и обновата на стариот струмички театар е тема на струмичката чаршија, но и тема на многу избори и политички ветувања. За жал, таквите ветувања за обновување на театарот никој до сега не смогна сили да го исполни.
-Не беше ниту лесно, ниту едноставно. Но, она што го зацртавме бевме силно решени да го исполниме и го исполнуваме. Од денеска започнува новото раѓање на стариот струмички театар, рече премиерот Груевски во март оваа година.
Министерката Елизабета Канческа Милевска во неколку наврати и најавуваше рокови за театарот, а според нејзината одамнешна изјава досега ќе требаше веќе и да функционира.
До август ќе бидат изготвени сите потребни проекти за реконструкција на стариот струмички театар, а очекуваме во ноември да започнат работите на терен.
Се надевам дека во рок од година и пол ќе го вратиме стариот сјај на струмичкиот театар, рече министерката за култура во јуни 2012 година.
