Министерот за одбрана на Република Македонија Талат Џафери денеска беше во посета на ренџерскиот баталјон кој се наоѓа на повеќедневна обука за преживување во природа на планината Бистра.
Оваа обука е неопходна бидејќи на припадниците на Полкот за специјални операции им овозможува да се справат со сите потреби во различни временски услови и на различни терени и да се снаоѓаат во природата, истакна министерот за одбрана, Талат Џафери.
Џафери посочи дека ренџерите совршено ги имаат совладано своите теоретски предзнаења и техники за снаоѓање и за преживување во природа и дека целосно ги имаат пренесено и во пракса.
Обуката на ренџерите содржи техники за подготовка и за поставување на камп, техники за ловење на диви животни и собирање на диви растенија, како начин на исхрана и нивно приготвување во природата.