Во соборниот храм Свети Кирил и Методиј во Тетово денеска беа изложени посмртните останки на упокоениот митрополитот полошко – кумановски г. Кирил.
Се одржа упокоена литургија со која чиноначалствуваше викарниот епископ лешочки г. Јосиф, заедно со свештениците од тетовското архиерејско намесништво.
„На тетовчани им ја покажавте љубовта кон православната црква и кон се што е свето. Иако Вашето тело денеска овде лежи без здив, над нас лебди Вашата бесмртна душа. За последнен пат пред Вас во Тетово Ви ја укажуваме последната почит, но нема зборови кои би ја искажале Вашата добрина. Денес пред Вас стоиме со трепет и тажни простувајќи се со Вас горди сме што Ве имавме, како што ти се гордееше со нас“.
Верниците од Тетово се простија од владиката Кирил и рекоа дека ќе ги паметат убавите спомени за него и се запишуваа во книгата на жалост.
Митрополитот полошко – кумановски г. Кирил почина во вторникот на 79 години. 26 години ја водеше полошко – кумановската епархија. Тој беше единствениот жив сведок на прогласувањето на автономноста на Црквата.
Посмртните останки вчера беа изложени во соборниот храм „Свети Никола“ во Куманово. Погребот ќе биде извршен утре во манастирот Свети Ѓорѓија во кумановско Дељадровце.
