На покана на Изет Еровиќ, директор на Центарот за култура на општина Бијело Поље, Република Црна Гора, делегација од општина Струмица беше гостин на 11-от Интернационален фестивал на тамбурашки оркестри.
Во рамките на посетата, претседателот на општина Бијело Поље, збратимена општина со општина Струмица, Александар Журиќ, организираше прием за делегацијата на Струмица во Спомен куќата на познатиот црногорски поет Ристо Ратковиќ, каде, после приемот, беше одржана и гастрономска и туристичка презентација на Струмица.
Градоначалникот Журиќ истакна дека Бијело Поље и Струмица имаат доста сличности и заеднички цели, што беше и главната причина за збратимувањето на двата града. Исто така подвлече дека Бијело Поље и Струмица се специфични порти на Црна Гора и Македонија, погранични општини со големи земјоделски потенцијали, со исти цели кога се во прашање европските интеграции.
Раководителот на одделението за Локален економски развој во општина Струмица, Тони Милушев, заблагодарувајќи се на домаќините за укажаната чест и покана за присуство на фестивалот, истакна дека со ваквите форми на дружење можеме да се сподели се што е заедничко, да се понесат нови искуства, се со цел унапредување на односите и развојот на понатамошните облици на соработка за унапредување и подигање на квалитетот на животот на граѓаните на општинините Струмица и Бијело Поље.
