Покрај критиките и минатогодишните протести за начинот на кој се изведува екстерното тестирање, учениците и оваа година ќе полагаат по стариот принцип.
Иако најавите се дека учениците без проблем и со мали задоцнувања го полагаат екстерното тестирање, сепак тие секојдневно на социјалните мрежи објавуваат фотографии со аномалии од компјутерското тестирање. Овојпат, ученик до редакцијата на А1он испрати фотографија од екстерното тестирање на кое прашањето е „Што можеш да прочиташ на оваа географска карта на Република Македонија?“, а на тестирањето фотографија нема.
Минатата година средношколците осумнаесет дена кампуваа пред Министерството за образование и наука, по што им беше ветено дека ќе учествуваат во преговорите за нова форма на полагање на државната матура, но министерството никако не попушти за екстерното тестирање кое наместо да биде подобрено, од година во година појавува се поголемо незадоволство кај учениците, родителите и голем дел од професорите.