Центарот за Развој и Унапредување на Јавниот Живот – Тетово во соработка со Здружение на граѓани Х.Е.Р.А – Скопје спроведува безплатни гинеколошки прегледи, кои се нудат во Мобилната амбуланта за сексуално и репродуктивно здравје, која во Тетово е сместена на градскиот плоштад.
Акцијата се реализира во рамки на проектот „Одржување ниска преваленца на ХИВ во Република Македонија“, кој е поддржан од Министерството за здравство.
Амбулантното возило е опремено со гинеколошки стол, ЕХО апарат, медицински инструменти и материјал. Гинеколошките услуги се нудат од гинеколог-акушер и медицинска сестра-акушерка.
Целта на активноста е да се подобри пристапноста и квалитетот на услугите од областа на сексуалното и репродуктивно здравје помеѓу жените од тешко достапни и ранливи популации. Во мобилната амбуланта може да се изврши гинеколошки преглед, ЕХО прегледи, папаниколау тест, како и дијагноза и третман за сексуално преносливи инфекции.
Сите услуги кои се нудат се бесплатни и доверливи. Не се потребни сини картони, здравствена книшка или каков било документ за лична идентификација. Во текот на прегледот и советувањето дозволено е присуство само на лекарот и медицинската сестра. Сите податоци добиени за време на советувањето, како и резултатите од испитувањата, не се споделуваат со други лица.
Услугите ќе се нудат во следните 4 години.