„Апаши, апаши“, вака извикуваа пред Собранието на Република Македонија хонорарците, студентите, невладини организации, актерите, уметниците, граѓаните.
Со извиците и паролите „Не сум економски роб“, „Намалете ги хонорарите и на функционерите“ и „Сиромашните – посиромашни, богатите – побогати, започна протестот, со кој насобраните сакаат да и докажат на власта дека не се согласуваат со мерката, на сите приходи од хонорари да наплатуваат придонеси од 34 посто.
Како што инсистираше организаторот протестот е непартиски, без партиски обележја. Застанувајќи пред споменикот „Прометеј“, Здравко Савевски од „Ленка“ рече – Ако за гаќите на Прометеј имало 100 илјади евра, како сега нема пари за друго, и мора преку одземање пари од хонорарите да се полни буџетот.
„Се зема од сиромашните за се повеќе да се дава на богатите“, рече Савевски.
Групата тргна кон Министерството за труд и социјална политика, а потоа ќе се движи и кон Владата на Република Македонија.
На протестот се придружија и студентите кои се солидаризираат со барањата од протестот, а кој што се незадоволни од тоа што без јавна дебата, владата ги изигра и на вчерашната отворена седница едногласно го поддржа Законот за високо образование.
Студентите не се согласуваат со воведување на државен испит, затоа бараат обединување.
Т.Ц