Фондацијата Метаморфозис стана дел на една од најголемите мрежи за слобода на изразување, ИФЕКС (www.ifex.org). ИФЕКС е акциска мрежа, која има 88 членки во 60 земји ширум светот, а најголем дел од нив се од земјите во развој.
Вo регионов мрежата има по една членка од Србија и Албанија (а од денес и од Македонија) и по две членки од Романија и Турција.
Во ИФЕКС членуваат и Article 19, Фридом хаус, Репортери без граници, Хјуман рајтс воч, Индекс он цензоршип, Меѓународниот ПЕН и низа други меѓународни асоцијации.
Оваа мрежа се обидува да го сврти вниманието кон настани и случки кои влијаат врз слободата на изразување, користејќи ги своите канали, воедно преку градење коалиции, работни групи, заеднички изјави, петиции, но и организирани конференции и работилници. Дополнително, мрежата објавува и ресурсни материјали со цел да ги засили капацитетите на своите членки и да се поттикнат позитивни промени.
ИФЕКС во минатото спаси животи на борците за слобода за изразување ширум светот, а врши притисок врз владите да ги напуштат законите кои се опресивни и овозможува поддршка, како и контакти за изолираните индивидуалци и групи со цел да се приклучат и да лобираат за слободата на изразување.
Идејата за создавање на глобална мрежа на организации за заштита на слободата на изразување првпат е предложена во 1992 година во Монтреал, Канада, со цел да се координираат активностите на различните организации. Во периодот од 1993-96 мрежата се консолидира на начин кој овозможува да им помага на земјите во развој, а од 2007 година се развиени и стратешки кампањи и програми за поддршка.