Секој ден има нови случаи со морбили. Околу 30 пациенти се лекуваат на Клиниката за инфективни болести од кои најголем број се деца. Вкупниот број случаи од почетокот на епидемијата досега е 150, изјави денеска министерот за здравство Венко Филипче.
Појасни дека резултатите од опфатот со вакцинацијата од почетокот на епидемијата, досега, се одлични.
– Близу половина од невакцинираните деца се до Скопје, сега се вакцинирани и се надевам дека овој тренд ќе продолжи понатаму со што на некој начин како прво ќе го ограничиме ширењето на епидемијата, а и ќе влијаеме во иднина таа да не се случува, рече Филипче, одговарајќи на новинарско прашање пред почетокот на панел дискусијата во рамки на одбележувањето на 4 февруари, Светски ден за борба против рак.
Во врска со тоа дали Клиниката за инфективни болести има капацитет поради големиот број случаи со морбили и со оглед на тоа дека пикот на грипот епидемиолозите го најавуваат овој месец, рече дека таму одвоиле две крила на едно одделение, каде се изолирани пациентите со морбили.
– Нема така голем број случаи со грип засега. Се надевам така и ќе остане. Нешто е помал процентот на случаи во однос на минатите години, меѓутоа Клиниката има капацитет, а доколку има потреба и во други институции, додаде Филипче.