Се уште е рано да се размислува за отворањето на аеродромите, рече денес министерот за здравство Венко Филипче. Тој потсети дека се уште е на сила препораката граѓаните што стигнуваат во земјава да одат во државен карантин во времетраење од 14 дена.
„Се уште е рано да размислуваме за отворањето на аеродромите. Тоа отвора други прашања за тоа од каде доаѓаат луѓето. Голема бројка на граѓани ќе стигнат. Се уште е на сила препораката за државните карантини и тоа останува засега. Не размислуваме за промена на оваа стратегија. Се уште траат консултации со околните земји за некаква форма на регионален пристап“, рече министерот Филипче.
Комисијата за заразни болести, како што вчера извести министерот Филипче, ја разгледувала можноста за воведување имунолошки пасош за граѓаните од нашата земја кои сакаат да патуваат како и за странците што ќе пристигнат кај нас, но конкретно решение се уште нема.
Аеродромите во Македонија беа затворени во март. Прв беше затворен аеродромот во Охрид со одлука на 14 март, заедно со затворањето на поголемиот дел од граничните премини, а на 16 март Владата одлучи да го затвори и скопскиот аеродром како и сите гранични премини за да се спречи ширењето на коронавирусот.
