Претседателот на СДСМ, Венко Филипче, на денешната прес-конференција го најави Фронтот за вистина и правда, посочувајќи дека во него се вклучуваат различни општествени групи и политички субјекти, обединети околу вредностите за Европска Македонија.
„Денеска го објавувам фронтот за вистина и правда кој го сочинуваат опозициски партии, граѓански организации, невладини организации, видни интелектуалци, поединци, независни активисти, млади, сите обединети околу вредностите за Европска Македонија“, посочи Филипче.
Филипче нагласи дека процесот на објавување на учесниците ќе се одвива постепено и во фази.
„Кој сè е дел од тој фронт, ќе објавуваме во фази, постепено. Јас во име на фронтот ќе ги презентирам идеите и принципите, како и главните програмски столбови“, појасни Филипче.
Филипче објасни и дека дел од учесниците засега нема да бидат објавени за да се избегнат притисоци и да се поштедат луѓето од црната кампања на ВМРО-ДПМНЕ.
Претседателот на СДСМ ги претстави и основните столбови на програмата на заедничкиот Фронт.
„Нашата заедничка програма, Фронт за вистина и правда, има четири главни столбови. Прво, нулта толеранција за корупција и европска правда. Второ, иднина за младите. Трето, достоинствен живот за сите, подобар животен стандард. И четврто, силно село и земјоделци“, изјави Филипче.