Можно е Македонија кон средината на годинава да го почне процесот за интеграција во Европската унија, изјави еврокомесарот за проширување Штефан Филе во интервју за австрискиот весник „Клајне Цајтунг “ кое денеска го пренесуваат грчките медиуми.
Според него, Македонија и Србија кон средината на годинава можат да ја започнат интеграцијата во Унијата, но нагласи дека „тоа сепак зависи од земјите-членки“. Филе истакна дека, според него, во Унијата „нема замор од нови интеграции“.
– Двата главни столба на ЕУ, кои се движечка сила уште од нејзиното основање, се проширувањето и продлабочувањето на интеграцијата кои се поттик за Унијата и нејзините граѓани, ја пренесуваат грчките медиуми изјавата на Филе.
Тој рекол дека иако вниманието сега е фокусирано на решавање на финансиската и должничката криза во Европа, посочил оти не верува дека процесот на проширување е проблем, туку напротив – секогаш е дел од решението.
Еврокомесарот за проширување информира и за текот на преговорите за пристапување на Турција, Исланд и Црна Гора. Според него, „исклучително важно“ е да продолжат преговорите за пристапување со Турција. Ирското претседателство во ЕУ би можело да биде пресвртна точка и Анкара треба да се охрабри во напорите за спроведување на реформите, оценува Штефан Филе.
